أيها الرجل لِمّ نفسك

هدي شعبان

من بدري قوي، والست في بلدنا بتتعلم إن عمرها متقسّم بمحطات، وكل محطة لها حكمها الجاهز.

لو اتأخرت شوية في الجواز، يبقى في حاجة غلط.

لو اتجوزت وما كملتش، تبقى مطلقة.
ولو كبرت، فجأة تبقى عجوزة… وكأن الزمن عيب، وكأن العمر إدانة.
الكلمات دي مش مجرد أوصاف، دي أحكام.

بتتلزق في روح الست قبل اسمها، وتفضل تمشي معاها في كل حتة، مهما كانت ناجحة، قوية، أو حتى راضية عن نفسها.

في المقابل، الراجل قصته أبسط.
ما حدش بيحاسبه على عمره، ولا على اختياراته العاطفية، ولا على تأخيره.

الميزان دايمًا مايل، وكأن المجتمع قرر من زمان إن المرأة هي اللي لازم تبرر وجودها، وتشرح نفسها، وتدافع عن اختياراتها.

المرأة… الكائن اللي اتخلق وهو شايل ذنب مش ذنبه.

حواء اللي شالوا فوق كتافها حكاية الخروج من الجنة، وفضل الذنب يتوارث، جيل بعد جيل، لحد ما بقى جزء من الوعي الجمعي.

تحمّلت المرأة عن الرجل فشله وأخطاؤه، واتقال لها — بصوت عالي أو واطي — إن السبب دايمًا فيها.
الأوجع من ده كله إن الستات نفسهم بقوا أحيانًا يعيدوا إنتاج القسوة دي.

بدل ما نطبطب على بعض، بنسأل أسئلة تقيلة:
اتجوزتي ولا لسه؟
خلفتي؟
طب ليه ما اتجوزتيش؟
أسئلة شكلها عادي، لكن جواها شك، وحكم، ومقارنة.
ولو كانت الست جميلة، يبقى الامتحان أصعب.

تتحط تحت المجهر، تتقاس أخلاقها من شكلها، وتتعرض لنظرات وكلام يوجع، كأن الجمال تهمة محتاجة دفاع.

من كتر الضغط، الست اضطرت تعيش في حالة دفاع مستمر.
بعضها حاول ينسى طبيعته، أو يقلد الرجل، أو يلبس قناع مش شبهه، بس علشان يحس بالأمان أو القبول.

ومع الوقت، اختلطت الحكايات، وضاعت البوصلة، وبقينا نشوف بنات تايهة بين إنها تكون نفسها، أو تكون اللي المجتمع عايزه.

السؤال الحقيقي مش: إمتى الست تتجوز؟
السؤال: إمتى الست تتصالح مع نفسها؟
لما الست تحب نفسها من غير شروط،
وتحترم اختياراتها،
وتبطل تعتذر عن كونها امرأة،
ساعتها بس تبدأ السعادة الحقيقية.

والست المتصالحة مع نفسها، بتربي بنت واثقة،
وبتربي ولد محترم.
لأن الاحترام مش دروس،
ده طبع بيتزرع في البيت، على إيد ست راضية عن نفسها.

أنا مؤمنة إن ده مش حلم بعيد.
ده ممكن، وحقيقي، وقابل يتحقق.
بس لما نقرر نكون أرحم…
على نفسنا الأول.