“الشحموطي”: قرار الحكومة ضرنا بزاف وماشي في الصالح ديالنا

كشف “منير”، الملقب ب”الشحموطي”، رئيس جمعية تاموسيدا للفن التراثي الأصيل بمدينة القنيطرة، عبر اتصال هاتفي بالمصدر ميديا، عن واقع الشغيلة في الحفلات والأعراس بعد القرارات الجديدة التي اتخذتها الحكومة.

قال: “هاد القرار أثر بشكل سلبي على الفرقة، مازال ما عوضناش الضرر اللي عشناه منين بدات الجائحة، حطيت العرابن في اللبسات، وشريت متريال جديد من فاس، وشديت عرابن من الناس على أساس غادي نخدموا ونعوضوا السنة ونص اللي ما خدمناش فيها بسبب ظروف الجائحة، ودابا تحطينا فموقف صعب مع الناس اللي كانت باغا نخدموا ليها وعطاتنا تسبيق وحجزات. هاد القرار ضرنا بزاف وماشي في الصالح ديالنا”

وأردف: “بالنسبة للشهر اللي خلاونا نخدموا فيه راه فالحقيقة ماشي شهر كامل خدمناه، كنخدموا مرة ولا جوج مرات في السيمانة يعني ماشي جميع الفرق تتخدم، بزااف ديال الناس متضررين بنات سربايات كيبكيو من الأزمة ديال الوضع” 

وأكد “منير”، على أن فرقة تاموسيدا والتي تضم أربعة عشر عضواً، بمن فيهم السائق الذي يشرف على نقل الفرقة من وإلى مكان العمل، تضررت بشكل كبير إثر الظروف التي فرضتها الجائحة.

قال: “14 عضو بمعدل 14 أسرة متضررة، عندي الدراري مجوجين تزيروا بزاف، خدامين معايا شباب موجزين وفي مجموع الفرق اللي كنشكلوهم كيوصل العدد لحدود 40 شخص..،” وختم حديثه: “الوضع كارثة وصافي“.